پکتيا کې د هګيو چرګانو ۵۸۸ فارمونه جوړېږي
د پکتیا ولایت دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې «FAO» په مالي او د افغانستان لپاره د ناروې کمېټې په تخنیکي همکارۍ ددې ولایت د مرکزګردیز په بېلابېلو کلیو کې ۵۸۸ بېوزلې، کونډې او معیوبو ښځو ته د دوی دکورني اقتصاد د پیاوړتیا په پار د هګیو چرګانو ۳۰ قطعه یې فارمونه جوړېږي.
په دې اړه جوړه شوې غونډ کې، د افغانستان لپاره د ناروي کميټې د کرنې برخې مسوول رحمت خان وويل، چې د فارمونو د جوړونې لپاره يې تر دې وړاندې د مرغانو وسايل توزیع او پر مټ يې مرغ خونې جوړې شوي، نوموړي زياته کړه چې نن ورځ هرې کورنۍ ته ۱۵۰ کيلو د چرګانو دانه، ۳ د دانې او ۳ د اوبو لوښي توزیع کوي او په راتلونکي کې به هرې کورنۍ ته ۳۰ قطعې چرګان هم وويشل شي.
په همدې حال کې د پکتیا دکرنې رییس الحاج مولوی عبدالرؤف سعید په خپلو خبرو د اړمنو کورنيو لپاره د چرګانو د فارمونو جوړول د اقتصادي پياوړتيا لپاره اغېزناک وبلل او په دې برخه کې يې د افغانستان لپاره د ناروي کميټې هڅې وستايلې، نوموړي له ګټه اخيستونکو وغوښتل، چې سمه ګټه ترې پورته او پالنې ته پاملرنه وکړي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته زمینه برابرول دي.
