په پنجوایي کې ۲ زره بزګرانو ته د غنمو اصلاح شوی تخم او کیمیاوي سره ووېشل شوه
۲۹ لړم ۱۴۰۳ه.ش
۱۷ جُمَادَى الأول ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅو، د خوراک نړیوال سازمان په مالي ملاتړ او د یوې خیریه موسسې په تخنیکي همکارۍ، په پنجوایي ولسوالۍ کې ۲ زره اړمنو بزګرانو ته د غنمو اصلاح شوی تخم او کیمیاوي سره ووېشل شوه.
دغه مرسته د کرنې او مالدارۍ د مسؤلینو تر څارنې لاندې، د یوې روڼې پالیسۍ له مخې ترسره شوه، چې پکې هغه بزګران شامل دي چې ۲ تر ۵ جریبه ځمکه لري او اقتصادي وضعیت یې کمزوری دی.
د مرستې په ترڅ کې هر بزګر ته ۵۰ کیلوګرامه د غنمو اصلاح شوی تخم، ۵۰ کیلو سپینه سره او ۵۰ کیلو توره سره ورکړل شوه، ترڅو دوی د راتلونکي فصل لپاره پر وخت چمتو شي.
یادې مرستې د بزګرانو ملاتړ، د اصلاح شویو تخمونو دودول او د کمو ځمکو څخه د ډېرو حاصلاتو ترلاسه کولو په موخه ترسره شوې. د یادونې وړ ده چې په ډند ولسوالۍ کې هم ورته مرستې ترسره شوې، چې پکې له ۳ زره بزګرانو ملاتړ شوی دی.
