وچکالۍ او پېښو سره د مبارزې په اړه ځانګړې غونډه
د جمهوررئیس محمد اشرف غني په مشرۍ وچکالۍ او پېښو سره د مبارزې په اړه ځانګړې غونډه نن له غرمې مخکې په ارګ کې جوړه شوه.
په پیل کې، د جمهوري ریاست لومړي مرستیال امرالله صالح وچکالۍ سره د مبارزې پلان په اړه مفصل معلومات وړاندې کړل.
وروسته اړوندو مسوولینو د ۱۴۰۰ کال وچکالۍ ته د ځواب ویلو پلان، د هیواد د غذایي امنیت ، د مالدارۍ پر سکتور د احتمالي وچکالۍ خطرونو او زیانمنېدونکو ولسوالیو ته د رسېدګۍ پلان په اړه خپل معلومات او راپورونه غونډې ته وړاندې کړل.
جمهوررئیس غني یادو موضوعاتو او د هیواد امنیتي وضعیت ته په پام، د جمهوري ریاست لومړي مرستیال دفتر، د چارو ادارې لوی ریاست، د کرنې، اوبو لګولو او مالدارۍ او مالیې وزارتونو او پېښو ته د رسېدو په چارو کې د دولت وزارت ته لارښوونه وکړه چې وچکالۍ سره د مبارزې پر پلان بیاکتنه وکړي او تر لازمو اصلاحاتو وروسته یې جمهوري ریاست سره شریک کړي.
