هلمند کې د کب روزنې پنځه فارمونه فعال او ګټې اخیستنې ته وسپارل شول
۷ غبرګولی ۱۴۰۳ه.ش
۱۸ ذوالقعده ۱۴۴۵ه.ق
د هلمند دکرنې، اوبولګولو او مالدارۍ ریاست وایي، چې په دې ولایت کې د کب روزنې فارمونه ورځ تر بلې ډېریږي او په دې برخه کې د خلکو لېوالتیا هم زیاته شوې ده. د چارواکو په خبره د هلمند نهرسراج کې د خصوصي سکټور له خوا د کب روزنې پنځه بابه نوي فارمونه جوړ او ګتې اخیستنې ته وسپارل شول.
د هلمند دکرنې ریاست له خوا ددې ولایت په څېړنیز فارم کې د کب روزنې دوه ستر فارمونه هم رغول شوي، دي چې یادو فارمونو کې د کبانو ښه نسلونه روزل کېږي او د کب روزنې په برخه کې د بزګرو او خلکو د عملي او نظري زده کړو په موخه ورڅخه ګټه اخیستل کېږي.
د هلمند دکرنې ریاست په دې ولایت کې د کبانو د صنعت د پراختیا په پار ډېرې هلې ځلې کوي او یوشمېر کسانو ته یې په دې برخه کې د روزنې ترڅنګ د بېلابېلو اړینو توکو ویشلو زمینه هم برابره کړې ده.
دیادولو وړ ده، چې هلمند کې دامهال نږدې ۳۰۰۰ د کبانو روزنې فارمونه شتون لري، چې له یادو فارمونو څخه تېرکال شاوخوا ۷۰ ټنه کبان تولید شوي دي، دغه کبان د هلمند ترڅنګ کندهار، فراه، هرات، نیمرزو او کابل ته هم لېږدول کېږي.
