هلمند کې د ٢٤٠ جریبه مېوه لرونکو بڼونو جوړولو چارې پیل شوې
۵ کب ۱۴۰۳ه.ش
۲۴ شَعبان المُعَظّم ۱۴۴۶ه.ق
دهلمند ولایت د کرنې، اوبولګولو او مالدارۍ ریاست په هلو ځلو، ددې ولایت په موسا قلعه، سنګین، کجکي او نوزاد ولسوالیو کې د ٢٤٠ جریبه مېوه لرونکو بڼونو جوړولو چارې پیل شوي دي.
په دغو بڼونو کې هربڼوال ته د اړتیا وړ نیالګي چې پکې انځر، انار، انګور، شفتالو، بادام او املوک شامل دي، چې په وړیا ډول وېشل کېږي چې وروسته به دغو بڼونو ته د څاڅکي اوبو سیستم هم ورغول شي.
دغه راز بادو بڼوالو ته د یو شمېر کرنیزو توکو ترڅنګ، د بڼونو جوړولو په برخه کې مسلکي روزنه هم ورکول کېږي، ترڅو دوی وکولای شي په مسلکي ډول خپل بڼونه وروزي.
دغه پروسه د ډاکار مؤسسې په تخنیکي ملاتړ، د نشئي توکو او جرایمو په وړاندی د مبارزی لپاره د ملګروملتونو دفتر او جاپان هېواد په مالی ملاتړ ترسره کېږي.
د مېوه لرونکو بڼونو جوړول د بزګرانو لپاره یو مهم او ګټور کار دی، ځکه چې دا نه یوازې اقتصادي عاید زیاتوي، بلکې د چاپېریال ساتنې، د خوړو خوندیتوب، او د کرنیزې ودې لپاره هم ګټور تمامېږي.
دهلمند ولایت د کرنې ریاست هڅه کوي، چې د ارزښت لرونکو مېوه یي بڼونو د جوړولو په برخه کې د ځمکوالو لپاره اسانتیاوې رامنځته کړي، ترڅو ددوی کرنیز اقتصاد ورسره وده او پراختیا ومومي.
