هلمند کې د نیالګیو د تولید په پار هڅې
۱۹ زمری ۱۴۰۲ه.ش
۲۳ مُحَرَّمُ الحَرام ۱۴۴۵ه.ق
دهلمند ولایت د کرنې، اوبولګو اومالدارۍ ریاست اړوند د طبيعي سرچينو آمر الحاج قاري دين محمد مغفور او د ياد آمریت سیمه ییزو کارکوونکو د طبیعي سرچينو اړوند د بولان د نیالګیو روزلو قوریې څخه ليدنه وکړه.
د لیدنې په ترڅ کې د بولان مرکزي قوري بېلابېلو برخو څخه څارنه او د نويو نيالګيو ارزونه ترسره شوه .
ښاغلي مغفور د بولان د مرکزي قوري د نوي نيالګيو پر ډېرښت او د یادو برخو د ښې ساتنې او روزنې برخه کې اړونده کارکوونکو ته لازمې سپارښتنې وکړې .
ددې ترڅنګ نوموړي اړوندو کارکوونکو ته وويل، چې د نويو نيالګيو د ښې روزنې او پالنې برخه کې ځانګړې پاملرنه کوي ترڅو د کیفیت او کمیت له مخې هلمندي ځمکوالو ته باکیفیته نیالګي تولید کړي.
د یادولو وړ ده، چې د هلمند د کرنې ریاست هرکال زرګونه مېوه لرونکي او بې مېوې نیالګي په یاده قوریه کې په فني توګه روزي او بیا یې د ځانګړې کړنلارې له مخې د بزګرو په واک کې ورکوي.
