هلمند کې د سبو او مېوو مارکېټ ګټې اخیستنې ته وسپارل شوه
۲ وږی ۱۳۹۹
د هلمند د کرنې، اوبولګولو او مالدارۍ ریاست وایي، چې په دې ولایت کې د لومړي ځل لپاره د خصوصي سکټور په اډانه کې د مېوو او سبو ځانګړی مارکېټ جوړ او ګټې اخیستنې ته وسپارل شوه.
په هغه غونډه کې، چې د یاد مارکېټ د پرانستې په پار جوړه شوې وه، دهلمند والي تورنجنرال محمدیاسین خان، د لښکرګاه ښاروال انجنیر عصمت الله صمدي، د کرنې رییس زلمی الکو او ددې ولایت یوشمېر نورو چارواکو ګډون درلود.
د هلمند دکرنې رییس زلمی الکو وویل، چې د هلمند په ولایت کې د بزګرو او بڼوالو د محصولاتو د پېر پلور لپاره مناسب ځای شتون نه درلود، چې له امله یې بزګران او بڼوال له ستونزو سره مخ ول. هغه وویل، چې ددې مارکېت په جوړېدو سره اوس بزګران کولای شي، چې خپل محصولات په مناسب ځای او مناسبه بیه خرڅ کړي.
د سبو او مېوو د غه عصري مارکېت لښکرګاه ښارته د ننوتو په دروازه کې جوړه شوې ده، چې د هلمند او نورو ګاونډیو ولایتونو سابه او مېوې به همدلته راوړل کیږي او بیا به د لښکرګاه ښار او د هلمند ولایت نورو ولسوالیو ته له همدې ځایه لېږل کیږي.
