هلمند کې د اوبو مهارولو په پار د یو شمېر بندونو سروې ترسره شوه

د هلمند ولایت شمالي ولسوالیو کې د اوبو د مدیریت او مهارولو په موخه په کجکي، سنګین او زمینداور کې د عمومي او فرعي سربندونو د رغولو په موخه لومړنۍ سروې ترسره شوه. 
د یادو بندونو د سروې چارې د ولایت مقام، علماؤ مشورتي شورا، کلیوبیارغونې او پراختیا ریاست، د کرنې ریاست او لښکرګاه ښاروالۍ د مسلکي انجنیرانو له لوري ترسره شوه، چې نوملړ او جزئیات به یې د وروستیو کړنو په موخه عالي مقاماتو ته وسپارل شي.
ددې سروې په ترڅ کې د سنګین ولسوالی د میانکو مانده، دکجکي ولسوالی د کنګیانو مانده او د زمینداور د شیرې مانده څخه له نږدې لیدنې وشوې او له سیمې څخه د بندونو جوړولو په پار اړین معلوماتونه راټول شول. 
د یادو بندونو په رغولو سره به د باراني او سیلابي اوبو د مهارولو او په راتلونکي کې د هلمند ولایت د شمالي ولسوالیو د وچکالی په کمولو کې د پام وړ نوښت او بهبود رامنځته شي.