هلمند ته د کرنې وزارت د ځمکو چارو د رییس سفر
٢۷ وری ۱۴۰۳ه.ش
۶ شَوّال المُکَرَّم ۱۴۴۵ه.ق
د کرنې، اوبولګولو او مالدارۍ وزارت د اراضۍ لوی رییس مولوي محمود مظلوم هلمند ولایت ته د خپل سفر په ترڅ کې ددې ولايت د کرنې رییس الحاج مولوي نیاز محمد وهاج سره ليدنه وکړه.
ددې لیدنې په ترڅ کې د هلمند ولايت د کرنې رییس الحاج مولوي نیاز محمد وهاج د اراضۍ لوی رییس مولوي محمود مظلوم او مل پلاوي ته يې ښه راغلاست ووایه او د دغه ولایت د ځمکوالۍ په برخه کې د اجراآتو، لاسته راوړنو، په دغه برخه کې د يو شمېر شته ستونزو او د راتلونکې پلانونه په اړه د اراضۍ له عمومي رییس سره خپل نظر شریک کړ.
ورپسې د اراضۍ عمومي رییس مولوي محمود مظلوم د هلمند ولایت د کرنې رئیس څخه په مننې، د ځمکو په برخه کې د عالیقدر امیرالمؤمنین (حفظه الله) د حکمونو مطابق د اراضۍ ریاست مسئولیتونه او لاسته راوړنې، د استرداد شويو ځمکو څخه په سمه توګه استفاده، د ځمکو اجاره او همداراز نور اداراتو ته د ځمکو د لېږد په اړه هم خبرې وکړې.
د هلمند ولایت د کرنې رياست د مختلفو څانګو مسوولينو هم په خپل وار خبرې وکړې او هلمند ولایت کې د ځمکو په برخه کې د کارونو، فعاليتونو او د دغه څانګې د اړتياوو په اړه هم خپل وړاندیزونه د اراضۍ لوی رییس ته وړانډې کړل.
په پای کې د اراضۍ عمومي رییس د هلمند ولایت د اراضۍ څانګې له ټولو مسوولينو سره د هر ډول همکارۍ ژمنه وکړه او له هغوی څخه يې وغوښتل، چې په خپلو دندو کې په پوره اخلاص او ايماندارۍ سره کار وکړي او هېڅ کله هم له ورسپارل شوي مسووليت څخه ناوړه استفاده ونکړي.
