هرات کې د زعفرانو د لومړني انسټیټوټ رغنیزې چارې د روان کال تر پایه بشپړیږي
۴ لړم ۱۳۹۹
د هرات د کرنې، اوبولګولو او مالدارۍ ریاست چارواکي وایي، چې د هرات د زعفرانو انسټیټوټ رغنیزې چارې روانې دي او د روان کال تر پایه به یې رغنیزې چارې بشپړ شي.
د هرات ولایت د زعفرانو انسټیټوټ رغنیزې چارې، د ۱۳۹۷یم کال د مرغومې په ۲۶ مه پیل شوې وه، چې درې پوړیزه دوه ودانۍ په کې شامل دي. د دې انسټیټوټ په بشپړېدو سره د هرات زعفران کارانو لپاره د معیاري روزنې زمینه برابریږي.
یاد انسټیټوټ د ۵۸.۸ میلیونه افغانیو په لګښت د کرنې وزارت د پراختیا یي بودیجې له لارې جوړیږي.
ټاکل شوې، چې ددې انسټیټوټ په فعالیت سره، په هرات او د هېواد په نوروسیمو کې د زعفرانو کرکېلي په موخه لا ډېرې وړتیاوې رامنځته شي.
هرات په افغانستان کې د ښه کیفیت لرونکي زعفرانو د تولید په برخه کې مخکښ ولایت دی، چې تېر کال ددې ولایت د زعفرانو د حاصلاتو کچه ۱۸ مټریک ټنو ته رسېدلې وه.
