نورستان کې د اوبومدیریت په پار هڅې؛ سلګونو کسانو ته دکار زمینه برابره شوې
۲۹ زمری ۱۴۰۲ه.ش
۳ صَفَرُ المُظَفَّر ۱۴۴۵ه.ق
د نورستان دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې په مالي او د افغانستان راتلونکي نسلونو مؤسسې په تخنیکي همکارۍ ددې ولایت د کامدېش او برګمټال ولسوالیو کې د اوبو مدیریت او خلکو ته دکار زمینې برابرولو په پار د یوې پروژې چارې پیل کړي دي.
د نورستان دکرنې، اوبولګولو او مالدارۍ رییس مولوی سلیمان ایمن وویل، چې دغه پنځه میاشتنۍ پروژه د کار په بدل کې د نغدو پیسو په ورکولو سره د یادو ولسوالیو د بزګرانو له خوا پلي کېږي.
ښاغلی ایمن وویل چې د دې پروژې په لړ کې به ۷۴۴۰ نفرو ته د کار زمینه برابره شوې، چې په پلي کېدو سره به یې زرګونه جریبه ځمکه خړوبه، د ځمکې لاندې د اوبو کچه به لوړه او د ځمکې د تخریب مخنیوی به ووشي.
د چارواکو په خبره په دې پروژه کې ۷۴۴۰ مستحق او بې وزله بزګرانو ته د ۲۰ ورځې کار په بدل کې د ۱۰۰ ډالرو معادل افغانۍ ورکول کېږي.
ددې پروژې د پلي کولو موخه خلکو ته د کار زمینه برابرول او په ټوله کې په یاده سیمه کې د اوبو مدیریت دی.
