نورستان کې د اوبولګولو ۳۰ ودانۍ رغول کېږي
۱۸ زمری ۱۴۰۰
د نورستان دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې «FAO» په مالي او د «NCRO» همکارې موسسې په تخنیکي مرسته په دې ولایت کې د اوبولګولو ۳۰ ودانۍ بیارغوي.
د نورستان دکرنې ریاست چارواکي وایي، چې د اوبولګولو د دغو ۳۰ ودانیو د بیارغولو ټولیز لګښت ۴۵۰ زره امریکایي ډالرو ته رسېږي، چې په رغولو سره یې د ګڼ شمېر بزګرانو د کروندو د اوبو ستونزې به هوارې او د اوبو د ضایعاتو مخه به ورسره ونیول شي.
دغه پروژې د نورستان مرکز پارون او ددې ولایت د واما په ولسوالۍ کې پلي کېږي، چې په کې د ویالو، سربندونو او د اوبو د زېرمو بیارغول شامل دي.
د اوبولګولو د یادو ۳۰ ودانیو په بیارغولو سره به ۱۲۰ هکټاره کرنیزه ځمکه خړوبه او سلګونه نارینه او ښځینه کروندګر او مالداران به ترې برخمنې شي، او د یاد ولایت د کرنیز سکټور د پیاوړتیا لامل کېږي.
باید وویل شي، چې د یادو پروژو په پلي کولو سره به دیادو سیمو د بزګرانو ډېرې ستونزې هوارې او د کرنیزو محصولاتو د کچې د لوړېدا لامل شي.
