نورستان کې بزګرو ته دعملي او نظري زده کړو په موخه ننداریزې قطعې جوړې شوې
۲۰ غبرګولی ۱۳۹۹
د نورستان د کرنې، اوبولګولو او مالدارۍ ریاست چارواکي وایي، چې په دې ولایت کې بزګرانو او کروندګرو لپاره د عملي او نظري زده کړو ورکولو په موخه د نباتي افتونو او ناروغیو د مخنیوي په برخه کې ننداریزې قطعې جوړې شوي دي.
د نورستان دکرنې ریاست وایي، چې ددې ولایت په مرکز پارون او نورګرام ولسوالۍ کې د نباتي ناروغیو هر اړخیز مخنیوی (IPM) په موخه چې صنعتي نباتات، سابه او مېوې په کې شامل دي څلور ننداریزې قطعې جوړې شوي دي.
د نورستان د کرنې ریاست د چارواکو په خبره په دې ننداریزو قطعو کې بزګرانو او کروندګرو ته د بېلابېلو نباتي ناروغیو د میخانیکي مخنیوی لارې چارې په عملي او نظري ډول ښودل کیږي.
باید وویل شي، چې دیادې پروسې له لارې به بزګر وتوانیږي ترڅو په اسانۍ سره مخکې تر دې، چې نباتي ناروغۍ او افتونه یې پر کښتونو یرغل وکړي مخه یې ونیسي، چې په دې سره به دبزګرو د صنعتي نباتاتو، سبو او مېوو کمیت او کیفیت ښه او لوړ حاصلات به ترلاسه کړي.
