ننګرهار کې څه باندې ۲۱۰۰ کسانو ته د لنډې مودې لپاره د کار زمینه برابره شوه
٢۵ تله ۱۴۰۲ه.ش
۲ ربیعالثاني ۱۴۴۵ ه.ق
د ننګرهار ولایت په چپرهار او اچین ولسوالېو کې ۲ زره او ۱۴۰ تنو ته د لنډې مودې لپاره د کار زمینه برابره شوه.
د ننګرهار د کرنې، اوبولګولو او مالدارۍ ریاست په هڅو د اکشن ایډ مؤسسي په تخنیکي همکارۍ او د ملګرو ملتونو د خوړو اوکرنې ادارې په مالي ملاتړ په چپرهار ولسوالۍ کې ۱۲۴۰ تنو او په اچین ولسوالۍ کې ۹۰۰ تنو ته د کار زمینه برابره شوه.
د ننګرهار د کرنې، اوبولګولو او مالدارۍ رییس مولوي عبدالستار محمد وویل په یادو لسوالیو کې ۲ زره او۱۴۰ تنه کارکوونکي په خپلو ولسوالیو کې د کاریزونو پاکولو، چیک ډیمونو، تراسونو او واټر شیټونو جوړولو کې کار کوي؛ چې هر کار کوونکې ته به د ورځې ۵ ډالره ورځني مزد ورکول کېږي.
د ننګرهار دکرنې رییس په خبره ددې کار څخه یې موخه د باراني اوبو زېرمه کول، د کاریزونو تانده کول او خلکو ته د کار زمیني برابرول دي.
د اکشن ایډ مؤسسه ددې پروژو پلې کولو سربېره د ننګرهار په ۲۲ ولسوالیو کې د اصلاح شويو تخمونو، حیوانې خوراکې او چرګانو واړه فارمونو جوړولو په برخه کې دبېوزله بزګرانو لاسنیوی کوي.
