ننګرهار کې څه باندې ۱۳ زره کاریګرو ته د کار په بدل کې دنغدو پیسو وېش پیل شو
۱۱ مرغومې ۱۴۰۲ه.ش
۱۹ جُمَادَى الثاني ۱۴۴۵ ه.ق
د ننګرهار کرنې، اوبولګولو او مالدارۍ ریاست سره په همغږۍ د ملګرو ملتونو د کرنې او خوړو اداري په مالي لګښت او د اکشن آیډ په تخنیکي همکارۍ ۱۳ زره او ۴۶۶ تنو کاریګرو ته دکار په بدل کې نغدو پیسو وېش پیل شو.
د ننګرهار کرنې، اوبولګولو او مالدارۍ رئیس مولوي عبدالستار محمد وویل د ننګرهار په ۱۱ ولسوالیو کې ۱۳ زره کاریګرو ته د کار په بدل کې د نغدو پیسو د ویش لړۍ پیل شوه؛ چې هر کاریګر ته ۶۸۵۰ افغانۍ د ۲۰ کاري ورځو مزد ورکړل شو.
نوموړي وویل د یادو کاریګرو په مرسته ننګرهار کې لسګونه چیک ډیمونه، واټر شیټونه جوړ او سلګونه کاریزونه، کانالونه او ویالې پاکې کړیدي.
د کرنې رئیس وویل ددې کار څخه یې موخه بزګرانو ته د اوبخور په برخه کې اسانتیا رامنځته کول او خلکو ته کاري بوختیاوي رامنځته کول دي.
دغه راز د همکارو پروژو او مؤسسو په مرسته په راتلونکی کې زرکونو نورو کسانو ته هم د کار زمینه برابره کړي.
