ننګرهار کې په امارتي ځمکو جوړ شوو ښارګوټو کې د کورونو د تثبیت چارې پیل شوې
۲۱ لېندۍ ۱۴۰۳ه.ش
۱۰ جُمَادَى الثاني۱۴۴۶ه.ق
د کرنې وزارت د ښاري سیمو د ثبت رییس مولوي عبدالصمد پاڅون په داسې حال کې، چې د ننګرهار د کرنې، اوبو لګولو او مالدارۍ رییس مولوي محمد ولي محسن یې ملتیا کوله د تخنیکي کارکوونکو پر مټ په ننګرهار کې د پینځو امارتي تثبیت شوو ښارګوټو د کورونو د ثبت پروسه پیل کړه.
په همدې حال کې د کرنې وزارت د ښاري سیمو د ثبت رییس مولوي عبدالصمد پاڅون او د ننګرهار د کرنې رییس مولوي محمد ولي محسن د شمشاد مېني اوسېدونکو او قومي مخورو سره ناسته ترسره کړه.
ښاغلي محسن وویل، چې د غصب مخنیوی کمیسیون حق حقدار ته سپارلو، عدالت تامئین، ځمکو تشخیص او تثبیت په موخه جوړه شوي ده.
د ننګرهار دکرنې رییس زیاته کړه، چې په ننګرهار کې پینځه ښارګوټي شمشاد مېنه، دولتزیو فامیلي، سیاسنګ، سرخ دیوال او قاسم آباد ښارګوټی چې د یو شمیر خلکو له خوا غصب شوي وو، تر هراړخیزې څیړنې وروسته معلومه شوه، چې یاد ښارګوټي په امارتي ملکیتونو کې جوړ شوي دي.
دغه راز د کرنې وزارت د ښاري سیمو د ثبت رئیس مولوي عبدالصمد پاڅون د سیمي خلکو سره د کورونو د ثبت پروسې، د کورنو څرنګوالي او نورو اړونده برخو کې معلومات شریک کړل.
ښاغلي پاڅون وویل، چې د کورونو ثبت د امیرالمومنین حفظه لله د حکم مطابق په عادلانه ډول ترسره کېږي.
