ننګرهار کې پر کوچیانو د څارویو د داخلي پرازیت ضد درملو د وېش کمپاین پیل شو
۱۰ زمری ۱۳۹۸
د ننګرهار ولایت د کرنې، اوبولګولو او مالدارۍ ریاست چارواکي وایي چې، د « CLAP » پروژې په همکارۍ د دې ولایت د مالدارو کوچیانو د مالونو خوندي کولو په پار د پرازیت ضد درملو د وېش کمپاین پیل شوی دی. د ننګرهار د کرنې ریاست وایي، چې په دې کمپاین کې به د کوچیانو د مالونو د خوندي کولو په پار د داخلي پرازیت ضد نږدې ۲۰ زره دوزه درمل ورکول کیږي ترڅو په همدې شمېر څاروي له دې ناروغۍ څخه خوندي کړي.
دغه درمل د ننګرهار د کرنې ریاست د هلو ځلو په ترڅ کې د « CLAP » پروژې له خوا چمتو شوې ده ترڅو د څاریو د خوندیتابه کچه لوړه کړي.
ددې کمپاین په لړ کې دغه راز کوچیانو ته د څارویو د داخلي پرازیتونو د زیانوننو، نښو او مخنیوی په هکله معلومات هم ورکول کیږي.
باید وویل شي چې، له ناروغیو سره د مبارزې په موخه د یاد کمپاین په پلي کېدو سره له یوې خوا د څاریو په منځ کې د وژونکو ناروغیو د خپراوي مخه نیول کیږي او له بلې خوانه د څارویو په منځ کې د تولید کچه هم لوړیږي.
