ننګرهار کې معیاري سړه خونه جوړېږي
۱۵ کب ۱۴۰۱ه.ش
۱۳ شَعبان المُعَظّم ۱۴۴۴ ه.ق
د ننګرهار دکانال ریاست چارواکي وایي، چې ددې ریاست اړوند هډې فارم حلقوي سړک ته څېرمه په لس جریبه ځمکه کې معیاري سړه خونه جوړېږي.
د چارواکو په خبره ددې سړې خونې رغنیزې چارې کابو دوه کاله مخکې پیل شوې وه، خو د نامعلومو لاملونو له مخې اوس په ټپه ولاړې دي.
دکرنې، اوبولګولو او مالدارۍ وزارت چاراوکي ددې سړې خونې د رغنیزو چارو د بیا پیل په پار هلې ځلې پیل کړي دي، چې ډېر ژر به یې رغنیزې چارې پیل شي.
د ننګرهار دکرنې ادارې د چارواکو په خبره، ننګرهار کې پر 25 زره جريبه ځمکه بېلابېل ډوله بڼوه لکه د ستروسو، خرماو، بېرې او نورو مېوو بڼونه جوړ شوي، چې دغه سړه خونه د بڼوالۍ د محصولاتو د ارزښت لوړولو په برخه کې یو مهم عامل ګڼل کیږي، چې په جوړېدو سره یې د بڼوالۍ د محصولاتو د خوسا کېدو مخه نیول کیږي.
له سړې خونې څخه په استفادې سره کرنیز محصولات پرخپل وقت او په مناسبه بیمه بازار ته وړاندې کیږي، چې د بڼوالو او بزګرانو په اقتصادي وده کې به رغنده رول ولري.
