ننګرهار کې د ولسوالیو د بوټو ساتنې چارواکي وروزل شول
د ننګرهار د کرنې ریاست اړوند د کرنیزو خدمتونو امریت د بوټو ساتنې او قرانطین لوی مدیریت له لوری د دې ولایت د ۲۲ ولسوالیو د بوټو ساتنې چارواکو ته د نباتي افاتو او ناروغیو مخنیوی برخه کې روزنه ورکړل شوه.
د پروګرام په پیل کې د ننګرهار د کرنې ریاست مرستیال قاری فضل الرحمن صادق د ولسوالیو د بوټو ساتنې چارواکو ته د حاضري د پابندۍ سربېره د شته امکاناتو څخه په ګټې اخستنې سره کروندګرو ته پر وخت د ښه خدماتو وړاندې کولو، د نباتي ناروغیو او افاتو پر خپل وخت کنترول او مجادلې برخه کې لازمي سپارښتنې وکړې.
همداراز د کرنیزو خدمتونو امر هم یادونه وکړه، چې د نباتي بېړنیو آفاتو او ناروغیو رامنځته کېدو صورت کې باید د خپل مدیریت سره په عاجله توګه په اړیکه کې شي، او د مخنیوي لپاره يي باید عاجل اقدام وشي.
