ننګرهار کې د نږدې ۱۸ میلیونه افغانیو په لګښت د بڼوالۍ توکي ووېشل شو
![ننګرهار کې د نږدې ۱۸ میلیونه افغانیو په لګښت د بڼوالۍ توکي ووېشل شو](https://www.mail.gov.af/sites/default/files/2024-08/img-20240831-wa0143.jpg)
۱۰ وږی ۱۴۰۳ه.ش
۲۷ صَفَر المُظَفَّر ۱۴۴۶ه.ق
د ننګرهار د کرنې، اوبو لګولو او مالدارۍ ریاست سره په همغږۍ د ډاکار خیریه موسسې په تخنیکي همکارۍ او د ملګرو ملتونو دمخدره توکو سره د مبارزې دفتر په مالي لګښت ۱۹۵ بڼوالو ته ۴۲۵ جریبه سوداګریز بڼونه جوړ شوي، چې اوس ورته دبڼوالۍ کڅوړې ووېشل شوې.
د ننګرهارد کرنې، اوبو لګولو او مالدارۍ رییس مولوي محمد ولي محسن وویل، چې د ډاکار موسسې له لورې په رودات، سره رود، خوږیاڼو او شېرزادو ولسوالیو کې ۱۹۵ بڼوالو ته سوداګریز بڼونه جوړ شوي؛ چې اوس ورته ۱۸ قلمه (کرنیز وسایل، درمل او کیمیاوي سرې) ورکړل شوې.
ښاغلي محسن زیاته کړه؛ څه موده وړاندې همدي بڼونو ته د څاڅکو اوبخور سیستمونه هم لګول شوي وو؛ چې ۷۰ سلنه د اوبو سپما ورسره رامنځته کېږي.
د کرنې رییس زیاته کړه په راتلونکی کې یادو بڼوالو ته دوه لمریزې تختې او سمرسیبل هم ورکول کېږي.
دغه راز ۱۹۵ بڼوالو ته په بڼونو کې د کرنیزو عملیو، هرزه وښو مخنیوی، اوبو لګولو، سرې استعمال، حاصل ټولولو او ګڼو نورو برخو کې وخت په وخت روزنې هم ورکړل شوي.