ننګرهار کې د شاتو مچیو روزونکو ټولنې ستونزو ته رسېدنه کېږي
د ننګرهار د کرنې، اوبولګولو او مالدارۍ ریاست مرستیال قاري فضل الرحمن صادق ددې ریاست په مقر کې د ننګرهار د شاتو مچیو روزونکو او د شینوارو شاتو مچیو روزونکو ټولنو له مسؤلینو سره د ستونزو د حل په موخه ناسته ترسره کړه.
ناسته کې د دواړو ټولنو مسؤلینو خپلې ستونزې د کرنې ادارې له مرستیال سره شریکې کړي، د ننګرهار د کرنې ادارې مرستیال د کارونو د شفافیت او ننګرهار کې د مچیو روزونکو فارم لرونکو ته د ښه خدماتو وړاندې کولو په موخه لازمې سپارښتنې وکړې او زیاته یي کړه، چې د دواړو ټولنو چارواکي مکلف دي، چې د شاتو مچیو روزنې سکتور لا تقویه کړي.
د ننګرهار دکرنې ریاست مرستیال ډاډ ورکړ چې د ننګرهار دکرنې ریاست هڅه کوي تر څو د ښیوې ولسوالۍ د ببېرو ځنګل په څېر په نورو ولسوالیو کې هم د شاتو مچیو روزونکو ته د بېرو ځنګلونه جوړ کړي تر څو دغه سکتور لاپسې تقویه شي.
