ننګرهار کې دڅلورو کانالونو د پاک کارۍ چارې پیل شوې
۸ لړم ۱۴۰۳ه.ش
۲۶ رَبِیعُ الْثاني ۱۴۴۶ه.ق
د ننګرهار د کرنې، اوبو لګولو او مالدارۍ ریاست سره په همغږۍ د بشري خیریه مؤسسې په تخنیکي همکارۍ او د «ډي ار اې» په مالي لګښت د ننګرهار په سپین غر او اچین ولسوالیو کې د ۱۷ زره او ۴۸۹ متره کانالونو پاکولو چارې پیل شوې.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د بشري خیریه مؤسسې له لورې په یادو ولسوالیو کې د اچین خاص، صندوق، باندر او اش خېلو کانالونو د پاکولو چارې پیل شوي، چې پکي ۲۰۰ بي روزګاره هېوادوالو ته د کار زمینه هم برابره شوې ده.
ښاغلي محسن وویل د یادو کانالو په پاکولو سره به زرګونه جریبه کرنیزو ځمکو ته د اوبو رسولو زمینه هم برابره شي.
دبشري خیریه مؤسسې مسؤل انجینر هدایت الله ثنایي وویل، چې د کانالونو د پاک کارۍ څخه موخه خلکو ته د کار زمینه برابرول او خوړو خوندیتوب رامنځته کول دي؛ ترڅو کورنۍ پر ځان بسیا شي.
