ننګرهار کې بې وزله او د طبیعي پېښو له زیانمنو کورنیو سره د مرستې لرۍ پیل شوه
۱۴ غویی ۱۴۰۴ ه.ش
۶ ذُو ٱلْقَعْدَةِ ۱۴۴۶ه.ق
د ننګرهار د کرنې، اوبو لګولو او مالدارۍ ریاست سره په همغږۍ د افغانستان راتلوونکي نسلونو مؤسسې په تخنیکي او د افغانستان بشري مرستو صندوق په مالي لګښت ددې ولایت په څلورو ولسوالیو کې بې وزله او د طبیعي پېښو زیانمنو کورنیو سره د ۳ میلیونه، ۸۷۱ زره او ۵۰۰ افغانیو نغدي مرستو لړۍ پیل شوه.
د ننګرهارد کرنې، اوبو لګولو او مالدارۍ رییس مولوي محمد ولي محسن وویل، په هسکه مېنه، بهسود، دوربابا او اچین ولسوالیو کې ۱۳۳۵ بې وزله او د طبیعي پېښو له امله زیانمنو شوو کورنیو سره نغدي مرستې پیل کړي.
ښاغلي محسن وویل، چې ددې مرستې په ترڅ کې هرې کورنۍ ته ۲۹۰۰ افغانۍ تر څلورو میاشتو پورې ورکول کېږي.
د ننګرهار دکرنې رییس زیاته کړه، چې په هسکه مېنه او دوربابا ولسوالیو کې ۹۰۰ تنو بزګرانو ته د بادرنګو، ټېنډۍ، توربانجانو، لیړوګانو او په کرنیزو وسایلو کې بېلچه، پنجي او کوداله هم ورکړل شوي.
ددې مرستو دوېش موخه د بې وزله او زیانمنو خلکو لاسنیوي او دخوړو خوندیتوب رامنځته کول دی.
