ننګرهار کانال شرکت کې د زیتونو حاصلاتو زیاتوالي په پار هڅې

د ننګرهار دکانال شرکت چارواکي وایي، چې ددې کانال اړوندو فارمونو کې د زیتونو بڼونو د حاصلاتو زیاتولي په پار هلې ځلې کوي.
د ننګرهارکانال شرکت د هډې فارم امر انجنیر سیداغا میاخېل وایي، چې په پلانې زیتون بڼونو کې د زیتونو د لوړ حاصل په موخه یې د مفت خورو د قطع کولو فعالیت پېل کړی دی.
انجنیر سیداغا میاخېل وویل، چې د ښاخبرۍ چارې د پلان له مخې ۲۵۰ هکټاره زیتون بڼونو کې اصلاحي ((مزاحم، وچ، ناروغ او داسې نور) څانګې غوڅې او ښآخبري به په کې ترسره شي.
نوموړي وویل، چې مفت خواره / مفت خورې د زیتون بوټي ته د غذا د رسېدو مخنېوي کوي ځکه د بوټي ټوله غذا همدا مفت خواره خوري، د مفت خورو نمو د اصلي بوټي نه تېزه وي. 
هغه زیاته کړه: «ددې لپاره چې موږ د زیتونو پراخه حاصلات ولرو او زیتون بوټي ښه وده وکړي نو اړينه ده، چې دا مفت خورې قطع شي، په همدې موخه موږهم په یادو زیتون باغونو کې د مفت خورو د قطع کولو چارې چټکې روانې کړي».
زیتون له مدیترانه یي نباتاتو څخه دی، چې کال کې یووار ترې حاصل راټولېږي.