ننګرهار کانال شرکت د سیلابونو د مخنیوي لپاره محافظتي دېوال جوړوي
د ننګرهار وادي کرنیز امارتي شرکت د کرنیزو ځمکو د ساتنې په موخه د هډې فارم په کمبو خوړ سیمه کې د محافظتي دېوال د جوړولو چارې پیل کړې دي. دې پروژه کې به سيمهییز مواد کارول کېږي، چې نږدې سل زره افغانۍ لګښت به ولري او د سیلابونو ګواښ به راکم کړي.
د شرکت د ساختمان امر انجنیر عبدالجلیل په وینا، دې پروژه کې ۲۱ متر مکعبه سنګکاري، ۲۰ متر مکعبه پرانه، ۵ متر مکعبه د تهدابونو کېندنه او ۴۰ متر مکعبه د غټو تېږو ځای پر ځای کول شامل دي. دا چارې به په راتلونکو پنځو ورځو کې بشپړې شي، چې په پایله کې به یې کرنیزې ځمکې، کورونه او سړکونه د سیلابونو له خطر څخه خوندي شي.
د ننګرهار وادي کرنیز امارتي شرکت د خپلو کرنیزو ځمکو ساتنې ته ځانګړې پاملرنه کوي. د دېوال جوړول به د هغو ځمکو لپاره مهم ګام وي چې د سیلابونو له امله هر کال له زیان سره مخ کېږي.
