ننګرهار: پر ۸۰۰ تنو کاریګرانو غنم ووېشل شول
۱ چنګاښ ۱۴۰۱ ه.ش
۲۳ ذوالقعده ۱۴۴۳ ه.ق
د ننګرهار ولایت د کرنې، اوبولګولو او مالدارۍ ریاست چارواکي وایي، چې د اوبو تنظیم او ضایعاتو مخنیوي، د سړکونو د بیارغونې او خلکو ته دکار زمینه برابرولو په موخه ددې ولایت په مرکز او ولسوالیو کې د کانالونو، ویالې، لښتیویو او کاریزونو پاکولو په پار دکار په بدل کې د غنمو دوېش پروژې له لارې ګڼې پروژې پلي شوي دي.
د چارواکو وپه خبره د ننګرهار ولايت د لعلپور او نیازیانو ولسوالیو کې د کار په بدل کی د غنمو د ورکړې پروژې له لارې د ۲۶ کیلومتره سرک د جوړونې او ۱۷ کیلو متره ویالو او کانالونو د پاکولو په بدل کې ۸۰۰ تنو کاریګرانو ته ۱۲۰،۵ مټریک ټنه خوراکې غنم وویشل شول. د یادو ولسوالیو د مسؤلینو په وینا چې وخت پر وخت د یادو پروژو څخه څارنه کول ځايي اوسیدونکې د پروژو د تطبیق څخه خوښ دي او د ورته پروژو د پلي کولو غوښتونکي دي.
دوی یاده برنامه ډېره ګټوره وبلله او زیاته یې کړه، چې غریبو خلکوم ته ددې برنامې په پېلېدو سره په کلېو او ولسوالیو کې دکانالونو، کاریزونو، ویالې او لښتیو په پاکولو سره د کار زمینه برابره شوې ده.
د یادونې وړ ده، چې د ننګرهار د ښار د ناحیو په ګډون په اچین، حصارک، بهسود او بټي کوټ ولسوالیو کې هم ورته پروژي جریان لري او په راتلوونکې کې به نورو ولسوالیو کې هم پیل شي.
