ننګرهار: د اماراتي، سلطانې، مرعي او وقفي ځمکو د غصب څخه د بېرته راګرځولو تخنيکي پلاوی څلورمه غونډه تر سره شوه

۷  لېندۍ ۱۴۰۱ه‍.ش
۳ جمادي اﻷول ۱۴۴۴ ه‍.ق
 د ننګرهار د کرنې، اوبولګولو او مالدارۍ ریاست رییس مولوی عبدالستار محمد تر مشرۍ لاندې د اماراتي، سلطانې، مرعي او وقفي ځمکو د غصب څخه د بېرته راګرځولو تخنيکي پلاوی خپله څلورمه غونډه تر سره کړه.
په دې غونډه کې د تېرې غونډې پر موضوعاتو رڼا واچول شوه، او پرېکړه وشوه چې د درونټي په غصب شوو سیمو کې چې د اشخاصو لخوا دوکانونه، هوټلونه او کورونه جوړ شوي دي، باید د قانون مطابق که د چا قرارداد نه وي شوي قرارداد دي وکړي او که د چا قرارداد وي باید قرارداد نوي کړي. 
همداراز د هسکه مینې او کوټ ولسوالیو تر مینځ د اماراتې ډاګ په اړه چې ځايي اوسیدونکو د شخصي ملکیت ادعا کوله هم تصمیم ونیول شو، چې راتلوونکې غونډې ته به د دواړو ولسوالیو اوسیدونکې خپل د ملکیت اسناد تخنیکې هئیت ته وړاندې کړي تر څو وروسته کوم اجراات چې په نظر کې دي عملي شي.
دغه راز په دې غونډه کې د ننګرهار د کرنې رییس مولوی عبدالستار محمد په مشرۍ کمېټه وټاکل شوه، چې په ترکیب کې يي د حج اوقافو، عدلیې، امنیه قومندانې، مستوفیت، نظامي څارنوالۍ ریاستونو استازې شامل دي،  د ښیوې ولسوالۍ اړوند د مروارید نهر لاندې کومې ځمکې چې د غاصبینو لخوا غصب شوي دي، له نږدې څخه وګوري او راتلوونکې غونډې ته خپل ګذارش وړاندې کړي.
په ورته وخت کې ددې غونډې په ترڅ کې د کارونو د چټکتیا او د اماراتي، سلطانې، مرعي او وقفي ځمکو د غصب څخه د بېرته راګرځولو په موخه د ولسوالیو په کچه یو معلوماتې کمیټه جوړه شي، چې په ترکیب کې يي د اړونده ولسوالۍ ولسوال د رییس په توګه د کرنې او اراضي مسؤل، امنیه قومندان، څارنوال، حقوقو مدیر، ښاروال، حج اوقافو مدیر، مالیه مدیر د استازو په توګه شامل وي، تر څو د ولسوالیو په سطحه د غصب شوو ځمکو په اړه معلومات راټول او تخنیکي پلاوی سره شریک کړي.