میدان وردګو ولسوالی کې پر یوشمېر بڼوالو کیمیاوي سرې ووېشل شوې
د میدان وردګو ولایت دکرنې، اوبولګولو او مالدارۍ ریاست د سولې بنسټ د کرنيزو محصولاتو بازارموندنې پروژې په همکارۍ ددې د مرکز په ګډون د نرخ، جلریز او سيدآباد ولسوالیو پر هغو بڼوالو چې د یادې پروژې له لارې ورته د مېوې بڼونه جوړ شوي دي یوریا سپینه او توره سره وېشل شوي دي.
د میدان وردګو ولایت دکرنې ریاست چارواکي وایي، چې د میدان وردګو ولایت دکرنې، اوبولګولو او مالدارۍ ریاست د سولې بنسټ د کرنيزو محصولاتو بازارموندنې پروژې په همکارۍ د ١٤٠٢ یم کال په ترڅ کې ددې ولایت د مرکز په ګډون په نرخ، جلریز او سيدآباد ولسوالیو کې ٢٩٢ جریبه بڼونه جوړ کړي دي، چې د یاد بڼونو د ودې په پار هر جريب بڼ ته ٥٠ کیلو ګرامه سپینه او ٢٥ کیلو ګرامه توره سره وېشلي دي.
د چارواکو په خبره یاد بنسټ په راتلونکې کې پلان لري، چې د بڼوالو ګروپونه جوړ،د شنو خونو لومړنۍ سروی ترسره، په متراکمو بڼونو کې پایې نصب، د فصل اړوند د کرنیزو آفتونو کنترول او بڼوالو ته د بڼوالۍ تنظیم په پار روزنیز پروګرامونه په لاره واچوي.
دمیدان وردګ ولایت دافغانستان دهغو ولایتونو له ډلې څخه دی، چې ډېری وګړي یې په کرنه په ځانګړې توګه په بڼوالۍ بوخت دي.
