میدان وردګو ولایت کې ۱۰زره غټو څارویو ته د واکسین کمپاین پیل شو

د میدان وردګو ولایت د کرنې، اوبو لګولو او مالدارۍ ریاست په هلو ځلو، د مالدارۍ او حیواني روغتیا آمریت د مسلکي کارکوونکو لخوا، د خوړو نړیوال سازمان په مالي مرسته، د لمپي سکین ناروغۍ مخنیوي په موخه د واکسین تطبیق کمپاین درېیم ځل لپاره پیل شو.
د دې کمپاین په ترڅ کې د چک، سیداباد، دایمیرداد، نرخ، جلریز او حصه دوم ولسوالیو کې شاوخوا ۱۰ زره غټو څارویو ته د لمپي سکین (د پوستکي ناروغۍ) ضد واکسین ورکول کېږي. یاده ناروغي چې دوه کاله وړاندې رامنځته شوې وه، مالدارانو ته یې پراخ مالي زیان اړولی، له همدې امله کرنې ریاست د دې ناروغۍ د مخنیوي لپاره دغه کمپاین پيل کړی دی.
د کرنې ریاست مسلکي ټیم د واکسین کمپاین څاري، ترڅو د معیاري تطبیق ترڅنګ ټولو اړینو سیمو ته سمه رسېدنه وشي.