میدانوردګ کې کروندګرو مېرمنو لپاره ۱۱۰ کورني باغچې جوړیږي
۲۸ تله ۱۳۹۹
د میدان وردګو ولایت د کرنې، اوبولګولو او مالدارۍ ریاست چارواکي وايي، دوی د نارینه وو بزګرانو ترڅنګ ښځینه وو بزګرانو ته هم ډېره پالرنه کوي د دوی په خبره یاد ریاست هلې ځلې کوي، چې د ښځینه وو بزګرانو عواید ډېر او اقتصادي ودې ته یې زمینه برابره کړي.
د میدانوردګو ولایت د کرنې ریاست چارواکي وویل، چې بېوزله مېرمنو لپاره د کورنیو باغچو د جوړولو په لړ کې داځل د کرنې وزارت د بڼوالۍ او مالدارۍ ملي پروژې «NHLP» په همکارۍ د مرکز میدان او بهسود ولسوالۍ په ۱۱۰ بېوزله کروندګرو مېرمنو د کورنیو باغچو د جوړولو اړین توکي وېشلي دي.
د میدانوردګو ولایت د کرنې ریاست د چارواکو په خبره د دغو کورنیو باغچو د جوړولو په پار پر دغو مېرمنو پر هر یوه یې د کورنیو باغچو د جوړولو د اړینو توکو ترڅنګ په کورنیو باغچو کې د کرکېلي په پار د بېلابېلو سبو تخمونه هم وېشل شوي دي.
د دغو توکو د وېشلو ترڅنک برخمن شوي مېرمنې په کورنیو باغچوکې د سبو تولید، حفظ الصحې او په کورنیو باغچو کې د محصولاتو د راټولولو او پروسس په برخه کې روزل شوي هم دي.
د میدانوردګو ولایت د کرنې ریاست د چارواکو وایي، چې کورني باغچې د کورنیو په اقتصادي وده او پرمختګ کې رغنده رول لري، چې ورسره به د دغو کورنیو د خوړو د خوندیتوب ترڅنګ اقتصادي حالت هم ښه شي.
