مالدارانو ته د چوپړتیاوو وړاندې کولو په پارهڅې؛ د ننګرهار دوو ولسوالیو کې د وټرنرۍ کلینیکونه ګټې اخیستنې ته وسپارل شول
٢۵ چنګاښ ۱۴۰۲ه.ش
٢۸ ذیالحِجّة ۱۴۴۴ ه.ق
د ننګرهار دکرنې، اوبولګولو او مالدارۍ ریاست چارواکي وایي، چې په دې ولایت کې مالدارانو ته د چوپرړتیاوو وړاندې کولو او په ټوله کې د مالدارۍ سکټور د ودې او خوندیتوب د هلوځلو په دوام د افغانستان لپاره د هالنډ کمېټې په همکارۍ ددې ولایت په دوو خوګیاڼو او دور بابا ولسوالیو کې د وټرنرۍ دوه کلینیکونه جوړ او ګټې اخیستنې ته سپارلي دي.
د یادو کلینیکونو د ګټې اخیستنې په مراسمو کې د ننګرهار د کرنې ریاست چارواکو، د یاد ولسوالیو ولسوالان، د افغانستان لپاره د هالنډ کمېټې استازو او یوشمېر نورو چارواکو ګډون درلود.
د ننګرهار دکرنې ریاست د څارویو د روغتیا امر ډاکتر محمد ضمیر بهسودي وويل، چې په خوګیاڼو او دور بابا ولسوالیو کې ۸۰ زره یو سومه او ۲۵۰ زره غټ او واړه څاروي د څارویو د خدماتو بي برخي وو، چې ددي کلینیکونو په جوړولو سره د درملو ترڅنګ واکسینونو، درملنې او لازمو مشورو سره د مالدارۍ سکټور کې به مثبت بدلونونه ولیدل شي.
ښاغلی بهسودي دغه راز زياته کړه دوه تنو ته د شپږو میاشتو لپاره د مالدارۍ او وترنرۍ خدمتونو په برخه کې روزنه هم ورکړل شوې ده.
د ننګرهار دکرنې ریاست د څارویو د روغتیا امر ډاکتر محمد ضمیر بهسودي دغه راز وویل، چې دیادو کلنیکونو لپاره یو عراده هونډا موټر سایکل، یو پایه سولري یخچال، مکمل سولري سیستم، ۶۶ قلمه د وترنري تخنیکي بسته، ۳۳ قلمه لوجستیکي بسته او ګڼ نور وسایل ورکړل شو، ترڅو مالدارانو ته ښه او بهتره خدمات وړاندې کړي.
