لوګر کې د کبانو د تولید او روزنې فارم جوړېږي
١۴ لړم ۱۴۰۲ه.ش
٢۱ ربیعالثاني ۱۴۴۵ ه.ق
د لومړي ځل لپاره د کرنې، اوبولګولو او مالدارۍ ریاست لخوا د لوګر په ولایت کې د نږدې درې میلیونه افغانیو په ارزښت د کبانو د تولید او روزنې دولتي فارم د جوړولو چارې پیل شوي دي.
په همدې تړاو جوړه شوی غونډه کې د لوګر ولایت د مقام دفتر رییس مولوی میرویس وحیدالله سربېره د کرنې، اوبولګولو او مالدارۍ رییس مولوی سیدامین هاشمي، د اقتصاد، سیندیزې حوزې، صنعت او سوداګرۍ رییسانو، یو شمېر نوروسیمه ییزو چاروکاو او قومي مشرانو ګډون کړی وو.
د لوګر ولایت د کرنې او مالدارۍ رییس مولوي سید امین هاشمي وویل:«د کبانو د تولید او روزنې دغه دولتي فارم د دوه جرېبه ځمکې پر سر د دوو نیمو میاشتو په موده کې د درې میلیونه افغانیو په ارزښت د کرنې وزارت له پراختیایي بودجې څخه جوړېږي.»
په ورته وخت کې د ولایت مقام د دفتر رییس مولوي میرویس وحیدالله د دغه فارم د چارو پیل د دې ولایت اوسېدونکو لپاره د کبانو د تازه او باکیفیته غوښې د وړاندې کولو لپاره اړین ګام وباله او ترڅنګ یې د کرنې ریاست له مسؤلینو هڅې وستایلې او د کرنې ریاست له مسؤولینو یی غوښتنه وکړه، چې له دغه فرصت څخه د کبانو د فارمونو د ترویج او د مینه والو د جذب لپاره د روزنې په برخه کې پوره ګټه پورته کړي.
ورته مهال د کرنې ریاست د مالدارۍ آمر په وینا دغه فارم دوه حوضونه لري، چې په یوه وخت کې د ٦ زرو کبانو د ساتلو او روزلو ظرفیت ولري او د یوه کال په موده کې به څلور ټنه غوښه بازار ته وړاندې او له دې لاره به شپږسوه زره افغانۍ د دولت بودجې ته ګټه ورسوي.
د یادونې وړ ده، چې اوسمهال لوګر کې د کبانو د روزنې او تولید په موخه شاوخوا لس شخصي فارمونه هم فعالیت لري.
