لوګر کې د څه باندې ۸۰۰ زره امریکایي ډالرو په ارزښت د یوشمېر پروژو چارې پیل شوې

۸ غبرګولی ۱۴۰۲ه‍.ش
۹ ذو القعدة ۱۴۴۴ ه‍.ق
د لوګر د کرنې، اوبولګولو او مالدارۍ ریاست د ملګرو ملتونو دخوړو او کرنې ادارې «FAO» په همکاری او د افغانستان راتلونکو نسلونو مؤسسې «FGA» په تخنیکي همکارۍ ددې ولایت مرکز پل علم په ګډون په درېوو ولسوالیو کې  د څه باندې ۸۰۰زره امریکایي ډالرو په ارزښت د ۴۳پروژو چارې پیل کړي دي.
په دې اړه جوړه شوې غونډه کې، د لوګر د کرنې، اوبولګولو او مالدارۍ رییس مولوي سید امین هاشمي، د محمدآغې ولسوال مولوي میرمحمد هاشم سادات، د همکارو موسسو استازو، یو شمېر نورو سیمه ییزو چارواکو او د سیمې اوسېدونکو او مشرانو ګډون کړی وو.
د لوګر د کرنې، اوبولګولو او مالدارۍ رییس مولوي سید امین هاشمي د دغو پروژو پر پیل خوښي څرګنده کړه او ترڅنګ یې له ولسونو وغوښتل، چې د یادو پروژو په ښه پلي کولو کې له مرستندویه موسسو سره پوره همکاري وکړي.
دغه راز د محمدآغې ولسوال میر محمد هاشم سادات د یادو پروژو پلي کول  ځايي ولسونو لپاره ډېر مهم وبلل او د همکارو مؤسسو مسؤلینو ته ډاډ ورکړ، چې د پلي کولو په برخه کې به یې له هېڅ راز هلو ځلو ډډه ونکړي.
ورته مهال د محمدآغې ولسوالی یو تن قومي مشر حاجي محمد رسول د لوګر د کرنې، اوبولګولو او مالدارۍ ریاست له مسؤلینو څخه مننه وکړه، چې د دغه ولسوالی د آبادۍ ترڅنګ د اړمنو ولسونو لپاره یې ښه کاري فرصتونه برابر کړي دي. نوموړي ډاډ ورکړ، چې ټول ولسونه به په پوره رښتینولي د دغو پروژو په تطبیق کې پوره همکاري وکړي.
د لوګر د کرنې، اوبولګولو او مالدارۍ ریاست د مسؤلینو په خبره دغه ۴۳ پروژې، چې پکې د چک ډېمونو د جوړولو سربېره؛ د کاریزونو او پلچکونو اساسي جوړول او رغول شامل دي، چې د پلي کولو پرمهال به یې د سیمو نږدې ٨٠٠٠ اوسېدونکو ته به د ۹ میاشتو لپاره د کار زمینه برابره شي.
د یادونې وړ ده، چې نږدې ورځو کې به د مرکز پل علم په ګډون برکي برک او خوښۍ ولسوالیو کې به هم د یادو پروژو چارې پیل شي.