لغمان کې زرګونو وړو شخوندوهونکو څارویو ته د ریخک واکسین کمپاین پیل شو
۱۲ تله ۱۴۰۴ هـ.ش
۱۱ رَبِیعُ الْثاني ۱۴۴۷ هـ.ق
د لغمان د کرنې، اوبولګولو او مالدارۍ ریاست تر چتر لاندې، د افغانستان لپاره د هالېنډ کمېټې «ډي.سي.اې» په مالي ملاتړ، د دې ولایت د مرکز مهترلام ښار په ګډون د ټولو ولسوالیو په کچه، د ۲۶ زره وړو شخوندوهونکو څارویو (وزو او پسونو) د ریخک (انتروتوکسیمیا) واکسین د تطبیق کمپاین د الیشنګ ولسوالۍ څخه رسماً پیل شو.
دغه کمپاین د لغمان د کرنې رییس مولوي عبدالستار محمد په لارښوونه، د دې ریاست د مالدارۍ او څارویو د روغتیا امر ډاکټر جوادالله علیزاده، د الیشنګ ولسوالی د مالدارۍ او کرنیزو خدمتونو د کارمندانو او د هالېنډ کمېټې ولایتي مسؤل ډاکټر محمد بیدار سیرت په حضور کې پرانیستل شو.
په دې پروګرام کې به د ولایت په کچه ټول ټال ۲۶ زره غټ او واړه څاروي وقعایه شي.
باید وویل شي، چې د لغمان د کرنې ریاست تل هڅه کوي د مالدارانو د ملاتړ او لاسنیوي ترڅنګ، د مالدارۍ سکتور د پراختیا لپاره د څارویو د ناروغیو پر وړاندې د وقایوي واکسینونو د تطبیق پروګرامونه عملي کړي.
