لغمان کې د کوچیانو څارویو د خوندیتوب په پار هڅې
۸ کب ۱۴۰۱ه.ش
۶ شَعبان المُعَظّم ۱۴۴۴ ه.ق
د لغمان دکرنې، اوبولګولو او مالدارۍ ریاست د افغانستان لپاره د هالنډ کمېټې (DCA) په همکارۍ په لغمان کې د مېشتو کوچیانو د څارویو خوندیتوب او د ناروغیو مخنیوي په پار ۳۰ زره د څارویو د ریخک یا (Entertoxma) واکسین او ۳۰ زره د داخلي چنجیو ضدر درملو د پلي کولو کمپاین د دې ولایت مرکز مهترلام له تبۍ کونج او ارهنډې سیمې څخه پیل شوی دی.
ددې کمپاین په پیل غونډه کې د لغمان دکرنې، اوبولګولو او مالدارۍ رییس مولوی محمدولي محسن د افغانستان لپاره د هالنډ کمېټې له چارواکو څخه مننه وکړه، چې تل یې د مالدارانو ستونزو ته رسېدنه کړې ده. ښاغلي محسن د یادې کمېټې له چارواکو وغوښتل، چې دې ورته نورې پروژې هم پلي کړي، چې د مالدارۍ سکټور ته یې ګټې ورسېږي او پراختیا ومومي.
دغه راز د لغمان دکرنې رییس مولوی محمد ولي محسن لغمان مېشتو کوچیانو ته سپارښتنه وکړه، چې ددې ولایت د مالدارۍ او حیواني روغتیا آمریت ډاکټران د دوی په چوپړ کې دي او دوی کولای شي، چې د خپلو څارویو د درملې او ستونزو د حل په پار دوی ته مراجعه وکړي.
