فراه کې د څلورو اوبولګولو کانالونو د رغونې پایلې وارزول شوې
د فراه ولایت د کرنې، اوبو لګولو او مالدارۍ ریاست د لارښوونې له مخې، د ناصر آباد او ریګي محمد اکبر کلیو اړوند څلورو اوبولګولو کانالونو د رغونې پروژې عملي ارزونه ترسره شوه.
دا ارزونه د یاد ریاست د طبیعي سرچینو آمر، کرنې متخصص او انجینرۍ ټیم له خوا د وروستیو اورښتونو وروسته، چې د فراه په سیند کې د اوبو جریان زیات شوی و، ترسره شوه، چې د یادې پروژې پایلې یې مثبتې وارزولې.
یادې پروژې د سولې بنسټ مؤسسې له خوا د ملګرو ملتونو پرمختیایي پروګرام (یو ان ډي پي) په مالي ملاتړ او د کرنې ریاست په همغږي په مروارید ۱، مروارید ۲، میانجو او ریګي محمد اکبر کلیو کې تطبیق شوې دي.
د سیمې بزګران د دغو پروژو له تطبیق څخه خوښ دي، ځکه چې د اوبولګولو په برخه کې ورته اړینې اسانتیاوې برابرې شوې دي. هغوی له مسؤلینو غوښتنه وکړه چې په دې ډول نورې پروژې هم پلې کړي.
