فراه کې د اوبولګولو د څاڅکو سیستم او کانال رغولو چارې پیل شوې
۱۲ لړم ۱۴۰۳ه.ش
۳۰ رَبِیعُ الْثاني ۱۴۴۶ه.ق
د فراه په ولایت کې د نږدې دوه نیم میلیونه افغانیو په لګښت د اوبولګولو د څاڅکو نوی سیستم او د یو کانال رغنیزې چارې د کرنې، اوبولګولو او مالدارۍ وزارت د پراختیایي بودیجې له لارې پیل شوې، چې د دې پروژې په بشپړېدو سره به سلګونه جریبه ځمکه خړوبه شي.
د فراه دکرنې ریاست چارواکي وایي، چې د کرنې، اوبولګولو او مالدارۍ وزارت د پراختیایي بودیجې له لارې د فراه په بڼونو سیمه کې د اوبولګولو د څاڅکو سیستم او د مرکز اړوند ننګ آب کلي کې د ۵۰۰ مترو په اوږدوالي کانال رغنیزې چارې پیل شوې.
د دې پروژې د پرانستې په مراسمو کې د اوبو د تنظیم او اوبولګولو د نوې تکنالوژۍ دودولو رییس مولوي معاذ الله عادل، د فراه د کرنې، اوبولګولو او مالدارۍ رییس الحاج مولوي شاه محمد حاجي سروري او د یو شمېر ادارو رئیسانو او استازو ګډون درلود.
د څاڅکو اوبولګولو سیستم او کانال به د درېیو میاشتو په موده کې په اساسي او پخې بڼه رغول کېږي. د دغو پروژو موخه د اوبو مدیریت دی، چې په بشپړېدو سره به د فراه په زرګونو جریبه ځمکه په آسانۍ خړوبه شي او کروندګرو ته به د اوبو برابرولو په برخه کې اسانتیاوې رامنځته شي.
د اوبولګولو د څاڅکو سیستم یوه نوې تکنالوژي ده، چې په لږو اوبو ډېرې ځمکې خړوبوي. د دې سیسټم تطبیق به د کرنې په برخه کې مثبت اغېز ولري او د فراه ولایت د کرنیزو ځمکو د خړوبولو لپاره د یوه دوامداره حل په توګه خدمت وکړي.
