غزني کې زرګونه څارویو ته د لمپي سکین وقایوي واکسین د تطبیق پروګرام پیل شو
دعزني د کرنې، اوبولګولو او مالدارۍ ریاست په همغږۍ او د ملګرو ملتونو د کرنې او خوړو نړۍوال سازمان په مالي همکارۍ ددې ولایت په مرکز او ولسوالیو کې څارویو ته د لمپي سکین (ال اس ډي) وقایوي واکسین د تطبیق پروګرام پیل شو.
د غزني ولایت د کرنې او مالدارۍ ریاست د مالدارۍ څانګې آمر ډاکتر حبیب الله دانش وویل، چې د لمپي سکین واکسین د کرنې او خوړو نړۍوال سازمان په همکارۍ د غزني مرکز او ولسوالیو څارویو ته چمتو شوی دی، چې په ترڅ به یې ۱۳۲۰۰ ډوزه واکسین ورکول شي.
نوموړي زیاته کړه، چې د دې پروګرام موخه د اړمنو مالدارانو ملاتړ او د څارویو وقایوي درملنه ده، ترڅو څاروي د پوستکي د دانو له ناروغۍ څخه خوندي شي. هغه یادونه وکړه چې په نږدې راتلونکي کې به د کرنې او خوړو نړۍوال سازمان په همکارۍ دغه واکسین په پاتې ولسوالیو کې هم پلی شي.
د غزني دکرنې رییس مولوی ګلاب الدین ذبیح الله د غزني له ټولو مالدارانو وغوښتل، چې د واکسین د تطبیق په برخه کې دې له سیمه ییزو ډاکټرانو سره همکاري وکړي، ترڅو دا پروسه په ښه توګه ترسره شي.
