شپږو ولایتونو کې ۷ زره او ۲۰۰ راستانه شویو کډوالو کورنیو لپاره د غنمو د ویش لړۍ پیل شوه
۴ سلواغه ۱۴۰۴ه.ش
۵ شَعبان المُعَظّم ۱۴۴۷ه.ق
د ا.ا.ا د زعیم عالیقدر امیرالمؤمنین حفظهالله تعالی د ځانګړي شفقت او مهربانۍ له مخې، د کندهار د کرنې، اوبو لګولو او مالدارۍ ریاست په هدایت او د اداري او مالي مدیریت په تخنیکي همکارۍ، د کندهار په ګډون په شپږو ولایتونو کې د ۷ زره او ۲۰۰ غریبو او تازه راستانه شویو کډوالو کورنیو لپاره د غنمو د ویش بهیر رسماً پیل شو.
د یادې مرستې په ترڅ کې، د کندهار، روزګان، غزني، زابل، دایکندي او پکتیکا ولایتونو مستحقو کورنیو ته د غنمو د ویش چارې پیل شوې دي. مسؤلین وایي، چې د یادو کډوالو د انتخاب او نوملیکنې پروسه تر دې وړاندې په بشپړه توګه ترسره شوې وه او اوس مهال د غنمو وېش عملي پړاو ته داخل شوې ده.
د چارواکو په وینا، د هر ولایت لپاره ۳۰۰ ټنه غنم د ۱۲۰۰ غریبو او راستانه شویو کډوالو کورنیو لپاره ځانګړي شوي دي، چې له مخې به یې هرې کورنۍ ته ۲۵۰ کیلو ګرامه غنم د یوې شفافې، منظمې او عادلانه پروسې له لارې په نږدې ورځو کې ووېشل شي.
راستانه شوي کډوال دغه اقدام پر خپل وخت او پر ځای اقدام بولي او د ا.ا.ا د زعیم عالیقدر امیرالمؤمنین حفظهالله تعالی څخه مننه کوي، چې تل یې د راستانه شویو کډوالو او اړمنو کورنیو ملاتړ کړی او دا ځل هم د هغوی د اړتیاوو د پوره کولو لپاره عملي ګامونه پورته کړي دي.
د یادونې وړ ده، چې دغه غنم تېر کال د عالیقدر امیرالمؤمنین حفظهالله تعالی د حکم له مخې پېرل شوي وو، چې اوس مهال یې ټاکل شوې اندازه غنم په یادو شپږو ولایتونو کې پر غریبو او نویو راستانه شویو کډوالو کورنیو باندې د هغوی په خپلو ولایتونو کې ویشل کېږي.
مسؤلین ډاډ ورکوي، چې د مرستو د ویش بهیر به د بشپړې روڼتیا، عدالت او منظم مدیریت تر اصولو لاندې پر مخ ولاړ وي، تر څو مرستې رښتینو مستحقینو ته ورسېږي او د هغوی د ژوند د ستونزو په کمولو کې اغېزمن رول ولوبوي.
دا په داسې حال کې، ده چې د کرنې، اوبولګولو او مالدارۍ وزیر مولوی عطاءالله عمري له خوا دغه بهیر په شمالي ولایتونو کې پیل شوی او په نورو ولایتونو کې به هم ډېر ژر پیل شي.
