شنې خونې د بادغیسي بزګرانو د عوایدو غوره سرچینې

۲۴ کب ۱۳۹۹
د بادغیس ولایت د کرنې، اوبولګولو او مالدارۍ ریاست چارواکي وایي، په ټولو موسمونو کې سابه او ترکاریو ته د بادغیس د خلکو د لاس رسي، د موسمي تولیداتو د زیاتوالي او په بازارونو کې د کرنیزو حاصلاتو د ډېرښت په پار بادغیس کې ۵۰۸ شنې خونې جوړ شوي دي.
د بادغیس ولایت د کرنې ریاست چارواکي وایي، چې د موسمي تولیداتو له پلوه د ځان بسیاینې په پار د یاد ولایت د مرکز او اړوندو ولسوالیو په څه باندې ۱۳ هکتاره ځمکه، کې ۵۰۸ شنې خونې جوړ شوي دي. د دوی په ټکو د یادو شنوخونو له ډلې ۲۷ یې د خصوصي سکتور له لارې، ۱۲ یې دولتي او پاتې ۴۶۹ بابه نورې یې د بېلابېلو پروژو له لارې جوړ شوي دي.
یادې شنې خونې شاوخوا د ۵۷۰ مټریک ټنو کرنیزو محصولاتو د تولید وړتیا لري.
دغه راز د راون کال په ترڅ کې د یادو شنو خونو له ډلې ۲۶ یې د کرنې د ودې او کلیوالي پراختیا پروژې « CBARD»   او ۱۰ نور یې د« World Visio» نړیوال دفتر له خوا نوي جوړ شوي دي.
په یادو شنو خونوکې  بېلا بېل سابه او ترکاري لکه بادرنګ، رومي بنجان او ګڼ نور حاصلات او ترڅنګ یې الوویرا کرل کېږي او د کال په ټولو موسمونو کې ترې حاصل تر لاسه کېږي، چې  د بزګرانو دعوایدو په ښې سرچینې بدل شوي دي.