سرپل کې د زعفرانو ګل لومړنۍ جشنواره پرانیستل شوه
۷ لېندۍ ۱۳۹۸
سرپل کې د زعفرانو لومړنۍ جشنواره پرون پرانیستل شوه. په دې جشنواره کې د سرپل والي عبدالقادر آشنا، په ملي او ولایتي شوراکي د خلکو استازي، د دولتي ادارو رییسانو، مېرمنې او ځوانان ګډون درلود.
د سرپل والي عبدالقادر آشنا وویل: «ددې غونډې ټولو ګډونوالو او زعفران کارانو ته د زعفرانو ګل د لومړنۍ جشنوارې مبارکي وایم. سرپل ولایت د ښه هوا او اوبو په درلودو سره په هېواد کې د زعفرانو د تولید په برخه کې درېیم ځای لري.»
د سرپل والي وویل:«ددې ترڅنګ چې د زعفرانو کرکېله بزګرانو لپاره د عوایدو ښه سرچینه ده، سلګونو نارینه او ښځینه و ته د کار زمینه هم برابروي.»
د سرپل د کرنې، اوبولګولو او مالدارۍ رییس محمدسلیم رنجبر دغه اراز وویل: «روان کال د سرپل په ۶۰ جریبه ځمکه کې د زعفرانو کرکېله شوې وه او په وروستیو پنځو کلونو کې کابو ۷۰ کیلو ګرامه زعفران تر لاسه شوي دي.»
ښاغلي رنجبر وویل، چې په سرپل ولایت کې د تېرکال په پرتله د زعفرانو په حاصلاتو کې ۳۲ سلنه زیاتوالی راغلی دی.
د سرپل د کرنې رییس وویل، چې یاده جشنواره زعفرانو کرکېلي ته د بزګرانو د هڅولو په پار په لاره اچول شوې ده.
