۲۷ تله ۱۳۹۹

د زابل ولایت دکرنې، اوبولګولو او مالدارۍ ریاست له خوا په دې ولایت کې د کروندګرو مېرمنو د پوهې او وړتیا لوړولو په پار ۲۵۷ مېرمنو ته په کورنیو باغچو او شنوخونو کې د سبو د کرکېلي لارې چارې وښودل شوې.

دغه روزنیزه برنامه د زابل ولایت په مرکز کلات کې په لاره اچول شوې وه.

په یاده برنامه کې ګډونکوونکې مېرمنې له دې روزنیزې برنامې څخه د مننې او خوښۍ ترڅنګ وویل چې، د کرکېلي په برخه کې اړین روزنې د کرنې په برخه کې د دوی د کارونو د ښه والي لامل کیږي او د دوی د کورنیو په اقتصادي وده کې له دوی سره مرسته کوي.

په ورته وخت کې په دې روزنیز پروګرام کې په ۲۵ مېرمنو د سبو د کرکېلي په پار شنې خونې هم وېشل شوي دي.

دغه شنې خونې د مېرمنو د اقتصادي ځواکمنتیا او په کورنیو کې د خوړو د خوندیتوب په موخه پر کروندګرو مېرمنو وېشل شوي دي.

د کرنې وزارت له خوا دغه شنې خونې په ژمي کې د تازه سبو د تولید او په لویه کچه د خوړو خوندیتوب او په مېندو او ماشومانو کې د خوارځواکۍ د مخنیوي په موخه وېشل شوي دي. دغه شنې خونې کروندګرو مېرمنو ته دا زمینه هم برابروي، چې د خپلو سبو د پلور له لارې ښه عواید تر لاسه کړي.