د کندهار معروف کې د غنمو اصلاح شوي تخم او کیمیاوي سرې د وېش دویمې لړۍ نوم لیکنه پیل شوه
۱۴ لړم ۱۴۰۳ه.ش
۲ جُمَادَى الأول ۱۴۴۶ه.ق
د کندهار ولایت په معروف ولسوالی کې د کرنې، اوبو لګولو او مالدارۍ ریاست په هڅه او د ملګرو ملتونو د خوړو او کرنې ادارې (اف. اې. او) په مالي ملاتړ، د (او. ایچ. ډبلیو) مؤسسې په تخنیکي همکارۍ، د غنمو اصلاح شوي تخم او کیمیاوي سرې د نوم لیکنې دویمه لړۍ پیل شوه. د دې پروسې تر بشپړېدو وروسته به زر غریبو او اړمنو بزګرانو ته ۵۰ کیلوګرامه د غنمو اصلاح شوی تخم، ۵۰ کیلو سپینه سره او ۵۰ کیلو توره سره مرسته ورکړل شي.
د نوم لیکنې لړۍ د معروف ولسوالی د کرنې او مالدارۍ استازو، امنیه قومندانۍ، استخباراتو او د کلیو استازو په څارنه کې ترسره کېږي، چې پکې هغه بزګران شامل دي چې له ۲ تر ۵ جریبه ځمکه لري، اقتصادي وضعیت یې کمزوری دی او د تخم او کیمیاوي سرې پیرلو توان نه لري.
د دې مرستې موخه په کندهار کې د اصلاح شویو تخمونو دودول، د بزګرانو ملاتړ او له کمو ځمکو څخه د لوړ حاصلاتو ترلاسه کول دي.
یادونې وړ ده، چې ورته نوم لیکنې لړۍ تېره ورځ په سپین بولدک ولسوالی کې هم پیل شوې وه، چې د هغې په ترڅ کې به له ۹۹۱ اړمنو بزګرانو سره مرسته وشي.
