د کندهار غورک ولسوالی کې د چکډېم د ودانیزې چارې ۵۰ سلنه پرمخ تللې
۲۰ سلواغه ۱۴۰۴ه.ش
۲۱ شَعبان المُعَظّم ۱۴۴۷ه.ق
د کندهار ولایت د غورک ولسوالۍ د پیرقدم په چهارپایو سیمه کې د یوه چکډېم د ودانیزو چارو ۵۰ سلنه بشپړ شوي دي.
د یاد چکډېم د ودانیزو چارو د کیفیت د ښه والي، د چارو د سم تطبیق او نږدې ارزونې په موخه، دکندهار دکرنې ریاست د انجنیرانو له لوري څارنه ترسره شوه. د څارنې پر مهال د پروژې مسؤلینو ته لازمې سپارښتنې وشوې، ترڅو ودانیزې چارې په لوړ معیار ترسره او پروژه د ټاکل شویو تخنیکي اصولو سره سم بشپړه شي، څو وروسته ترې د سیمې اوسېدونکي اغېزمنه ګټه واخلي.
د کندهار دکرنې ریاست انجنیر نورمحمد همکار وویل، چې له یادې پروژې څخه په دوامداره توګه جدي څارنه کېږي او د چکډېم روانې ودانیزې چارې له نږدې ارزول کېږي. د هغه په وینا، یاده پروژه د باراني اوبو د مهارولو په موخه پیل شوې، ترڅو د سیمې کرنیزې ځمکې اوبو ته لاسرسی پیدا کړي، د ځمکو زرغونتیا بېرته را ژوندۍ شي او د اوبو سطحه لوړه شي.
د یادونې وړ ده، چې دا مهال د کندهار ولایت په یو شمېر نورو ولسوالیو کې هم د چکډېمونو ودانیزې چارې پیل شوې دي، چې وخت پر وخت یې تخنیکي څارنه روانه ده.
