د کندهار دکرنې رییس د کرنې پراختیا په موخه له متخصصینو او رییسانو سره غونډه دائره کړه
د کرنې، اوبو لګولو او مالدارۍ وزارت په لارښوونه، د کندهار کرنې، اوبو لګولو او مالدارۍ رییس الحاج مولوي فضل الباري فضلي په مشرۍ، د کندهار اناسټو پوهنتون په تالار کې د هېواد د کرنې د پراختیا په موخه غونډه دائره شوه. په دې غونډه کې د کرنې وزیر سلاکار میرویس خوګیاڼي، د هېواد ۳۴ ولایتونو د کرنې رییسان، د کابل د کرنې پوهنځی رییس پوهنمل صفیالله جوهر، د اناسټو پوهنتون رییس شیخ مولوي سید محمد داود هاشمي، او د هېواد له بېلابېلو پوهنتونونو څخه استادانو، محقیقینو او متخصصینو ګډون درلود.
د غونډې په پیل کې، د کندهار کرنې رییس الحاج مولوي فضل الباري فضلي د تحقیق او څېړنو په ارزښت خبرې وکړې. هغه د نړۍوالو معیارونو پر اساس د څېړنې اهمیت په ډاګه کړ او یادونه یې وکړه، چې څېړنې د نباتاتو د ټولو خواصو د مطالعه او تحلیل لپاره اړینې دي. ښاغلی فضلي د کرنې ښوونکو ته وویل، چې څېړنې کول د دوی علمي مسؤلیت دی، په داسې حال کې چې د تطبیق او عملي کولو مسؤلیت یې د کرنې وزارت پر غاړه دی. هغه زیاته کړه، چې څېړنې او عملي کول به د هېواد د بزګرانو لپاره یو اغېزمن ګام وي، او باید دا چارې په عملي ډول وړاندې شي ترڅو د هېواد کرنې سکتور پیاوړی شي.
د غونډې په جریان کې، د کرنې وزیر سلاکار میرویس خوګیاڼي د کرنې متخصصینو او ښوونکو وغوښتل، چې د هېواد د کرنې د پرمختګ، په لیرو پرتو ولسوالیو کې بزګرانو ته د خدمتونو وړاندې کولو، د کرنې سکتور کې د نوې ټکنالوژۍ رواجولو او د نوښتونو د رامنځته کولو په برخه کې خپلې ګټورې مشورې له کرنې وزارت سره شریکې کړي. هغه ټینګار وکړ چې د نویو میتودونو په مرسته د کرنې پرمختګ به نه یوازې د بزګرانو اقتصادي وضعیت ښه کړي، بلکې د ټول هیواد اقتصادي حالت ته به هم پراختیا ورکړي.
همدارنګه، د کابل د کرنې پوهنځی رییس او د اناسټو پوهنتون رییس خپل نظریات او وړاندیزونه وړاندې کړل. له دې وروسته، د هېواد له بېلابېلو ولایتونو راغلو متخصصینو او استادانو خپل نظریات او مشورې تبادله کړې او اړین وړاندیزونه یې د غونډې په بهیر کې شریک کړل.
