د کندهار ارغستان کې سلګونو اړمنو کورنیو ته مرستې ووېشل شوې
د کندهار د کرنې، اوبو لګولو او مالدارۍ ریاست په هڅو، د (آی. آر. یو. کې) سازمان په مالي او د اسلامي هوساینې مؤسسې په تخنیکي همکارۍ، د ارغستان ولسوالۍ ۵۰۰ اړمنو کورنیو ته بلاربې وزۍ او د څارویو خوراکه ووېشل شوه. دا مرسته د یوې شفافې پروسې له لارې او د کرنې مسؤلینو تر څارنې لاندې ترسره شوه.
په دغه مرستې کې، هرې کورنۍ ته شاوخوا ۲۲ زره افغانیو په ارزښت یوه بلاربه ګلابي نسل وزه او ۵۰ کیلوګرامه د څارویو خوراکه ورکړل شوه، ترڅو د کورنیو اقتصادي وضعیت ښه شي او د دوی اړتیاوې پرې پوره شي.
یاده دې وي چې اسلامي هوساینې مؤسسه پلان لري چې په نږدې راتلونکي کې د کندهار په ارغنداب ولسوالۍ کې هم ۲۱۵ اړمنو کورنیو ته ورته مرستې ووېشي.
