د کندهار ارغستان کې د چکډېم رغنیزو چارو څخه څارنه وشوه
۲۸ لړم ۱۴۰۳ه.ش
۱۶ جُمَادَى الأول ۱۴۴۶ه.ق
د کرنې، اوبولګولو او مالدارۍ وزارت او د کندهار کرنې ریاست؛ د طبیعي سرچینو آمریت د یو کډ پلاوي په ترڅ کې د ارغستان ولسوالۍ سر درې سیمې چکډېم رغنیزو چارو څخه څارنه وکړه.
یاد ګډ پلاوي د کندهار ارغستان ولسوالی د سر درې چکډېم رغنیزو چارو د پرمختګ او کیفیت د ارزونې په موخه ددې چکډېم چارې وارزولې. د یادې څارنې پر مهال، د چکډېم د جوړېدو پر بهیر هر اړخیزه کتنه وشوه او د یاد پلاوي له لوري د چکډېم کارونو د ښه بهبود، لا ښهوالي او کیفیت لوړولو لپاره مهمې سپارښتنې وړاندې وشوې.
د یاد پلاوی په خبره، د ددې چکډېم چارې تر ۱۰ سلنه بشپړې شوي دي، چې پاته چارې به یې د دوو میاشتو په لړ کې بشپړې او ګټې اخیستنې ته به وسپارل شي.
یاد چکډېم د کندهار کرنې، اوبو لګولو او مالدارۍ ریاست په هڅو، دکرنې وزارت په پراختیایي بودیجه، او د یو خصوصي ودانیز شرکت په تخنیکي همکارۍ د ارغستان ولسوالی په سردرې کلی کې د ۳.۴ میلیونه افغانیو په لګښت د کندهار د طبیعي سرچینو آمریت تر مستقیمې څارنې لاندې جوړېږي.
دغه چکډېم د ۸۷ متره اوږدوالي، ۴ متره پراخوالي او ۷ مترو په لوړوالي سره په پاخه او اساسي ډول جوړېږي، چې په رغنیزو چارو کې یې ۱۰ کسانو ته په فني او ۱۵ نورو کسانو ته په غیرفني برخو کې د کار زمینه هم برابره شوې ده.
