د کندز چهار درې ولسوالی کې ۲۰ اړمنو کورنیو ته د چرګانو واړه فارمونه جوړ شول
۲۰چنګاښ ۱۴۰۳ه.ش
۴ مُحَرَّمُ الحَرام ۱۴۴۶ه.ق
د کندز د کرنې، اوبولګولو او مالدارۍ ریاست په هڅو دچهار درې په ولسوالی کې د آغاخان بنسټ په همکارۍ ۲۰ تنو هغه مېرمنو ته چې د کورنۍ د ګټي وټې مسولیت ور تر غاړي دي د دوی د اقتصادي پیاوړتیا په پار دوی ته د چرګانو واړه فارمونه جوړ شوي دي.
د کندز دکرنې، اوبولګولو او مالدارۍ ریاست د چاراکو په خبره هرې ګټې اخیستونکې کورنۍ ته ۲۵ قطعې کورني چرګان، ۱۵۰ کیلو د چرګانو دانه، درمل، دانه خوري او ابخوري ورکړل شوي دي.
د کندز دکرنې ریاست چارواکي وایي، چې د چرګانو د ورکړي موخه په کور دننه بېوزله کورنیو ته د کار زمینه برابرول دي؛ ترڅو د خوړو خوندیتوب رامنځته او کورنۍ پر ځان بسیا شي.
دغه راز یادو کورنیو ته د چرګانو پاللو، ناروغیو مخنیوی د واکسینونو تطبیق کولو او ګڼو نورو برخو کې روزنه هم ورکول کېږي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.
