د کندز د کرنې رییس د سره صلیب د شمال زون له اقتصادي مسؤول سره وکتل
۱۸وږی ۱۴۰۴ هـ.ش
۱۶ رَبِیعُ الْأَوَّل ۱۴۴۷ هـ.ق
د کندز ولایت د کرنې، اوبو لګولو او مالدارۍ رییس مولوي نیاز محمد عابد د سره صلیب د کمیټې د شمال زون له اقتصادي مسؤول اکرام الدین امیري سره لیدنه وکړه او د ګډو همکاریو پر موضوع یې خبرې اترې وکړې.
په دې ناسته کې دواړو لورو د کرنیزو پروژو د تطبیق او همکارۍ په اړه نظرونه تبادله کړل او د کندز ولایت په مرکز او ولسوالیو کې د کرنیزو فعالیتونو د پیاوړتیا پر لارو چارو وغږېدل.
مولوي نیاز محمد عابد د ښه راغلاست ترڅنګ وویل، چې د نړۍوالو بنسټونو همکاري د کرنې په برخه کې خورا مهم ارزښت لري او غوښتنه یې وکړه، چې پروژې باید په اغېزمن او پر وخت ډول عملي شي څو د بزګرانو معیشت ښه او د کرنیز سکتور بنسټ لا قوي شي.
همدارنګه، اکرام الدین امیري د سره صلیب د لا زیاتو همکاریو ډاډ ورکړ او زیاته یې کړه، چې د کرنې او مالدارۍ حمایوي پروګرامونه کولی شي د اقتصادي ودې او د بزګرانو د ستونزو په کمولو کې مهم رول ولوبوي.
