د کرنې وزیر په افغانستان کې د ترکیې له سفیر سره پر هوکړه لیکونو خبرې وکړې

۲۷ غبرګولی ۱۳۹۸
د کرنې، اوبولګولو او مالدارۍ وزیر نصیر احمد درانی دخپل کار په دفتر کې په افغانستان کې د ترکیې له سفیر اوزان ارطغرل او د هغه له مرستیال سره وکتل. په دې لیدنه کې دواړو خواوو د کرنې او بدیل کښتونو په برخه کې پر همکاریو او هوکړه لیکونو خبرې اترې وکړې.
د دوی دخبرو اترو اصلي موضوعات د اقتصادي، علمي او تخنیکي همکاریو د هوکړه لیکونو لاسلیکول و. باید وویل شي، چې تر دې مخکې هم پر دغو هوکړه لیکونو کار شوئ، چې ډېر ژر به بشپړ او لاسلیک شي.
دغه هوکړه لیکونه د کرنې، غذایي موادو، مالدارۍ او د څارویو د نسل د تولید د پراختیا په موخه لاسلیک کیږي.

په دې لیدنه کې په افغانستان کې د ترکیې سفیر اوزان ارطغرل وویل، دترکیې هېواد چمتو دی، چې د بدیل کښت او مخدره توکو سره دمبارزې په برخه کې پروژې پلي کړي. هغه وویل، چې دا پروژې به د ملګرو ملتونو له مخدره توکو سره د مبارزې ادارې او د کرنې وزارت په همغږی پلي شي.
د ترکیې سفیر زیاته کړه، کوم هوکړه لیکونه چې ټاکل شوې د افغانستان او ترکیې ترمنځ لاسلیک شي په اقتصادي، علمي او تخنیکي برخوکې ګټور دي.
په ورته وخت کې د کرنې وزیر نصیر احمد درانی د افغانستان دکرنې په برخه کې د ترکیې هېواد له مرستو څخه د مننې ترڅنګ وویل، چې د کرنې او مالدارۍ په برخه کې د ترکیې د همکاریو هرکلی کوی. د کرنې وزیر وویل، د کرنې وزارت دمګړۍ هم د هېواد په یو شمېر سیمو کې د بدیل کښت پروژې پلي کوي.
ښاغلی درانی وویل، چې د کرنې په برخه کې د افغانستان او ترکیې ترمنځ د هوکړه لیکونو د لاسلیک چارې به ګړندۍ شي تر څو په دې برخه کې د عملي کار زمینه برابره شي.